English  

Ftehim dwar il-Klassifikazzjoni u r- Regrading ta' l-Impjegati fis-Servizz Pubbliku Malti

Bejn l-1989 u l-1990, wieħed mill-għanijiet prinċipali tal-Kummissjoni għar-Riforma fis-Servizz Pubbliku (PSRC) kien li teżamina l-organizzazzjoni tas-Servizz Pubbliku u tagħmel rakkomandazzjonijiet fuq kif is-Servizz ikun jista' effettivament jirrispondi għall- ħtiġijiet ta' bidla li xtaq il-Gvern. Kien hemm ukoll il-bżonn ta' eżerċizzju biex tinħoloq struttura ġdida tal- gradi fis-Servizz Pubbliku, li dak iż-żmien in-numru tagħhom kien jaqbeż il-500, kif ukoll jitnaqqsu id-diversi skali fis-salarji li kienu madwar 86.

Il-Management & Personnel Office (MPO) ingħata r-responsabbilta' tal-implimentazzjoni tar-rakkomandazzjonijiet tal-Kummissjoni. Fit-twettiq ta' dan l-eżerċizzju, l-MPO daħal f'negozjati mal-Unions li jirrappreżentaw l-impjegati fis-Servizz Pubbliku fejn ġew diskussi u ntrodotti:

• Struttura ġdida ta' salarji għas-Servizz Pubbliku magħmula minn għoxrin skala

• Klassifikazzjoni ġdida ta' l-impjegati f'numru ta' setturi differenti skond il-klassi tal-impjegati

• Reviżjoni tas-salarji jew pagi b'rabta max-xogħol li jesiġi kull grad. Regolamenti u proċeduri ġodda ta' reklutaġġ f'kull grad, b'sistema ta' avvanz fil-karriera għal kull klassi ta' impjegat

• Fażi oħra mportanti f'dan l-eżerċizzju kienet l-introduzzjoni tal-prinċipju ta' promozzjoni bbażata fuq mertu. Is-sistemi ta' reklutaġġ u promozzjonijiet li kien hemm qabel fuq bażi ta' anzjanita' instabu li kienu pjuttost antikwati u nstab li ma kienux  jgħinu f'dak li hu 'management' effettiv u effiċjenti.

L-impjegati tas-Servizz Pubbliku huma miġbura fi strutturi skond il-klassi jew settur li jaqgħu taħtu. Hawn taħt jidhru xi wħud mill-kategoriji prinċipali:

• Klassi Amministrattiva.

• Klassi Agrikola

• Klassi Periti u Inġiniera Ċivili

• Klassi Impjegati tad-Dwana

• Klassi Dentisti

• Klassi Ekonomisti

• Klassi Edukattiva

• Klassi Inġienira

• Klassi Ndustrijali

• Klassi Legali

• Klassi Medika

• Klassi Infermiera u Paramediċi

• Klassi Spiżjara

• Klassi Xjentifika

• Klassi Ħidma Soċjali

• Klassi Impjegati Tekniċi

Kull Ftehim li ntlaħaq ma' l-Unions jiġbor fih:

• Struttura ġdida ta' salarji għal dik il-klassi ta' impjegati li dwarha sar il-Ftehim

• Il-kwalifiki meħtieġa għall-ingaġġ f'kull grad li jidher fil-Ftehim

• X' jeħtieġ impjegat biex  javvanza fil-karriera

• Tifsira ta' allowances u benefiċċji addizzjonali

• Provvedimenti oħra għall-impjegati fis-servizz fid-data ta' l-iffirmar tal-Ftehim